Өнгөрсөн шөнө дахиад есөн хүн угаартжээ

Ихэнх нутгаар цаг агаар сэрүүсч, шөнөдөө хасах хэм рүү орж, иргэд галлаж эхэлснээс хойш нийслэлд угаарын хийд хордсон дуудлага мэдээлэл тасрахгүй байна. Даваа гаригт 38 хүн угаарын хийд хордсон дуудлага ирсэн бол өнгөрсөн шөнө нийслэлд угаарын хийд хордсон есөн дуудлага мэдээлэл ирж, зарим иргэн эмнэлэгт хүргэгдсэн байна.

Иргэд сайжруулсан шахмал түлшийг буруу түлэх, мөн монгол гэр байшингийн яндангаа хөөлөөгүйгээс угаартаж байна гэх тайлбарыг албаныхан өгч байгаа.  Доорх зөвлөгөө мэргэжлийн байгууллагуудаас өгч байгаа юм.

1. Галлахын өмнө яндангаа буулгаж үзүүр хэсэгтээ арзгар тросстой урт саваагаар хөө, тортгийг цэвэрлэнэ.
2. Цэвэрлэсний дараа яндангийн нэг үзүүрт битүү уут углаж зөөлөн түншиж хөө, тортогийг хийнэ.
3. Дээрх үйлдлийг 2-3 удаа давтана.

Ханан пийшинг хэрхэн хөөлөх вэ?

1. Байшингийн шувуу нуруунаас дээш гарсан янданг үзүүртээ арзгар тросстой 6 метр урт саваагаар дотор ханыг үрж тортог, бохийг унагана.
2. Савааг ханан пийшингийн худгийн доод хэсэгт хүргэнэ.
3. Ханан пийшин хэдэн худагтайгаас хамаарч худаг бүрт нүх гаргаж, дотор хана, булан тохой,өнцгүүдийг сайтар цэвэрлэж хөө тортгийг хутгаж авна.

Анхаарах:
1. Яндан хөөлөх явцад гэмтэл үүсч ан цав гарахаас сэргийлээрэй.
2. Хэрэв яндан элэгдэж, нимгэран ан цав гарч цоорсон тохиолдолд битүүлж шавардах эсвэл солих шаардлагатай.
3. Янданг жилд 2-3 удаа хөөлж хэвшээрэй.

Хүн бүр хариуцлагатай байж дээрх зааврыг ягштал мөрдөж өөрийгөө болон хайртай хүмүүсээ угаарын хийн хордлогоос хамгаалаарай.

ХОЛБООТОЙ МЭДЭЭ

Back to top button
Close